1. 懷孕未夠3個月唔可以講？
據傳統習俗，懷孕前3個月BB的元神處於最不穩定狀態，孕婦有「胎神」保護，同時亦護佑胎兒平安，但「胎神」好小器，傳說太早公開孕事會有流產危機。
科學解釋
好多醫生指出懷孕前3個月胎兒較不穩定，數據更指出八成的自然流產在懷孕12週以前發生。為免空歡喜一場，所以一般孕媽都會陀足3個月待胎兒穩定才宣布喜訊。
2. 陀BB時唔可以搬屋或裝修？
傳說話搬屋會動到胎神，而裝修的話，亦可能會沖撞到胎神，引起小産或者對BB唔好。
科學解釋
其實主要因為不希望媽咪太過勞累。孕婦搬重物，有機會引發子宮收縮，導致早產或者流產，所以要小心。
3. 唔可能拍孕婦膊頭
坊間流傳「懷孕拍肩膀會流產」，因為每個人的肩膀上都有兩盞燈，如果拍熄就會流產。
科學解釋
突然從背後拍孕媽膊頭，可能會令她受驚。從中醫角度出發，人的肩膀上有個敏感的穴位「肩井穴」，有收縮子宮及催生作用，但仍然要以相當的力度按壓穴道才達到反應。
4. 孕婦唔可以抱其他BB
懷孕期間抱他人的小孩，肚中的胎兒會小器，因為相沖關係，會令胎兒出生後經常哭鬧同難帶！有些人相信頭三個月不能抱，亦有人話整個懷孕期都不應該抱。
科學解釋
因為小朋友容易亂動，抱他們的時候，小朋友可能會亂踢亂抓，所以有機會為孕媽帶來危險。而且，當孕媽彎腰將小朋友抱起時，腰部瞬間用力亦有機會對孕媽帶來傷害。
