受疫情影響，不少新人和藝人的婚期被受延誤，
到今年下半年婚禮限聚令逐步放寬，終於可以搞婚禮！
一同回顧今年宣佈婚訊的藝人～
姜文杰、李泳淇
姜文杰於2月22日同拍拖8年女友李泳淇（Rain）簽紙結婚。儀式只由雙方爸爸見證，低調進行亦無擺酒。姜文杰喺IG分享結婚相 同甜蜜愛的宣言：「我相信，一段美好既婚姻，最幸福既莫過於日日都同自己Best Friend一齊面對人生各種喜怒哀樂。我好幸福，因為我既Best Friend就係您。
多謝您屋企人對我既包容同埋接納。我會好好對待老婆，好好照顧、守護，同埋珍惜同老婆一齊既每一段時光，我也愛您地每一位。多謝您地。」
吳浩康、郭思琳
3月，歌手吳浩康（Deep）同模特兒女友郭思琳（Margiela）喺貝澳營地舉行小型婚禮，Deep同Margiela決定先註冊再補辦婚宴。Deep向傳媒表示：「雖然冇一個十全十美嘅婚禮，但亦都係疫情見證下嘅一個完美婚禮」
鄧小巧，白先生
舊年年尾，歌手鄧小巧宣布被外籍男友白先生求婚。 二人3月喺加拿大舉行婚禮。小巧透過Zoom直播，等大部份唔可以親身出席婚禮嘅親友可以網上觀禮，好友許廷鏗、鄭欣宜、林欣彤 等人都有隔空見證，送上祝福。
鄧小巧留言：「兩種語言 圓滿啦
在這個瘋子橫行的世界 只好跟著自己的步伐走
謝謝參與網上婚禮的香港朋友
因爲時差關係大家都只小睡或根本不睡來參加這亂世下的簡單婚禮
沒有鋪張 自己做一札花
在這好朋友的後花園求婚 在同一地方完婚
謝謝朋友溫暖的佈置 希望婚後生活也簡單、平淡美好」
吳業坤、濱口愛子
5月，32歲歌手吳業坤深夜突然喺IG宣布「小弟結婚了」，但未有透露另一半身份，但網民肉搜搵出太太疑似係日本女演員兼新聞之花濱口愛子（Aiko Hamaguchi）。Aiko於5月1日宣佈同「香港歌手」結婚並上載婚照，雖然老公個樣被遮住，但網民單憑耳仔形狀及一粒墨，認為老公就係坤哥。
吳業坤留言：「想簡單地同大家講一聲，小弟結婚了，感覺好微妙，一直都覺得自己仲係小朋友咁，唔知道幾時先叫大人，可能調番轉要比佢照顧番，但往後嘅日子，我會努力去守護，現在的我好幸福，謝謝大家一直以來嘅愛護及包容，接下黎都請繼續多多指教，最後，暫時關於她的事情都想留一點空間，日後再介紹給大家認識，謝謝大家！」
伍富橋、梁兆楹
歌手伍富橋（Alvin）同曾於TVB幕後工作嘅富家女梁兆楹拍拖半年。5月喺西貢相思灣屋企，於雙方家長見證下註冊結婚，正式成為夫婦，儀式簡單但一對準新人都感動落淚。Alvin話當日適逢母親節同佛誕，係非常特別嘅好日子，等到疫情完結再補辦婚宴同度蜜月。
姜麗文、柏豪
藝人姜麗文（Lesley）同老公柏豪原本定於2020年2月結婚，因為疫情影響令婚事延期，一等就等足兩年。
6月，Lesley終於喺IG報喜，上載婚照並宣布：「We Got Married」。據知婚禮當日只有佢同老公兩個人，地點係美國洛杉磯一個山頂，雖然雙方父母同親友都無在場，但大家隔空透過Zoom見證整個過程，婚禮簡簡單單，但Lesley話好幸福同好開心，二人希望等疫情穩定再喺香港補擺婚宴。
陳家樂、連詩雅
藝人陳家樂同連詩雅（Shiga）發展地下情兩年，從未公開承認過戀情；二人以情侶檔拍劇，到6月突然傳出陳家樂已經求婚成功嘅消息。
有指陳家樂約埋朋友同Shiga出海釣墨魚，可惜當日落雨，不過Shiga見家樂做曬準備功夫，所以繼續照行程出發，家樂就係喺船上攞住戒指向Shiga求婚，場面浪漫， 家樂回覆傳媒承認喜訊，話佢哋已經訂婚，但係結婚日子未有確實嘅計劃。
黃嘉樂、江惠賢
8月，藝人黃嘉樂同攝影師江惠賢（Samantha）結婚。嘉樂一早同埋兄弟團去到九龍The Ritz Carlton酒店接新娘；兄弟陣容包括：馬國明、唐詩詠、李天翔、楊潮凱和林子善等藝人。而新娘子一身金器勁有睇頭，除咗金豬，仲戴上十隻巨型龍鳳鈪登場～
陳煒、陳國強
9月，藝人陳煒同醫生男友陳國強喺半島酒店低調舉行婚禮。新娘子表示儀式從簡只宴請數十賓客。雖然婚事低調進行，但煒哥喺FB上載新相同大家分享喜悅。相中準新娘分別著上中西式紅色禮服，戴上金耳環、頸鏈同龍鳳鈪，明艷照人，十足廣告代言相呀～✨
陳煒留言：「實在太感激我的親戚和朋友們送我厚禮，讓我華麗出嫁 I Love you alllllllll」
李泳豪、Agnes
李家鼎細仔李泳豪（豪仔）同拍拖兩年幾任職寵物美容師嘅台灣女友Agnes註冊結婚，並喺鼎爺嘅私房菜館舉行儀式， 一班《愛．回家》演員呂慧儀、單立文、湯盈盈、姚瑩瑩、鄭世豪、徐榮都有到場祝福新人。鼎爺對媳婦Agnes非常滿意，希望佢哋結婚後可以快啲生個「鼎孫」。
張詩欣、陳家勝
11月， 於TVB《愛．回家》中飾演「李莫仇」嘅張詩欣同攝影師男友陳家勝結婚。由羅天宇、許家傑及周志康等擔任兄弟，姊妹團就有朱斐斐、芷晴、陳靖雲。婚宴亦有不少圈中台前幕後好友出席，包括：李佳芯、陳瀅、蔡思貝、劉佩玥(Moon)、JW、朱敏瀚、陳瀅、張達明、周嘉洛、鄭丹瑞、洪永城、徐榮、余思霆、蘇皓兒、鄺潔楹 (Judy)、林凱恩、翟威廉及張振朗等，場面熱鬧。
陳安立，林希靈
藝人陳安立（Brain）同前TVB「東張女神」林希靈（Agnes) 年初宣布婚訊， 今年平安夜喺深灣遊艇會舉行婚禮 ，開20圍宴請親朋，一對新人話好難得咁多朋友同時聚埋一齊，感覺似Christmas Party多啲～
