編輯：
你好。
最近我一個朋友就快結婚，搵姐妹我竟然無份！準新娘朋友唔算多，我和佢由細識到大，一直都當大家係好朋友，幾年前結婚我都有搵佢做姊妹，依家佢就快結婚了，竟然唔搵我。
雖然我哋曾經鬧過交，但都唔使咁反擊啊！
我真係覺得好尷尬，去朋友聚會，大家都問，「聽講阿A結婚喎，你哋揀咗姊妹裙未？」人人都覺得我一定會做佢姐妹，但唔係囉。佢就連就快結婚都無話我聽。我想講，佢男朋友都係透過我認識㗎！阿A依家都未搵齊姐妹，但都無搵我。我就透過其他朋友八卦啦！點知聽到呢句嘢「佢搵我做姐妹，我就要搵返佢㗎咩？」我真係無說話好講。
依家連佢婚禮我都唔想去，去到坐咩普通朋友席，我個心更加唔舒服！我係咪要同佢講，我唔去飲啦！唔使請我。但咁樣講，真係朋友都無得做。
詩
